Ավելի գործնական քայլերի անհրաժեշտություն

Դեռահասների վատ սովորությունները՝ հետագա հիվանդությունների առաջացման հիմնական պատճառ: Դեռահասները համարվում են հասարակության ամենաառողջ հատվածը, բայց նաեւ հենց այդ տարիքն է, որն ամենավտանգավորն է տարբեր վնասակար սովորությունների ձեռքբերման իմաստով։

«Համաշխարհային առողջապահական կազմակերպության ուսումնասիրությունները ցույց են տալիս, որ մեծահասակների մահացության մեծ մասը կապված է դեռահասության շրջանում առաջ եկած վնասակար սովորությունների հետ, ինչպիսին են՝ ծխախոտը, ալկոհոլը, թմրամիջոցները, անկանոն սեռական կյանքը», – երեկ կայացած քննարկման ժամանակ հայտնեց ԱԺ առողջապահության, մայրության եւ մանկության հարցերի մշտական հանձնաժողովի նախագահ Արա Բաբլոյանը։ Ըստ նրա՝ դպրոցահասակների եւ դեռահասների առողջության խնդիրը մշտապես գտնվում է ՀՀ կառավարության ուշադրության կենտրոնում, եւ այսօրվա քննարկումն ուղղված է նրան, որ գործնական քայլեր մշակվեն՝ դեռահասներին առողջ ապրելակերպ քարոզելու համար։

Առողջապահության նախարար Հարություն Քուշկյանը եւս չափազանց կարեւորեց լայնածավալ ռազմավարության մշակումն այս ուղղությամբ։ «Ազգաբնակչության առողջությունը երկրի գերակա խնդիրն է, երեխաների ու դեռահասների առողջությունը՝ առավել եւս։ Դա ոչ միայն առոջապահության նախարարության, այլեւ կրթության, սպորտի, մշակույթի գերատեսչությունների ընդհանուր խնդիրն է»,–ասաց նախարարը։ Նա նաեւ ընդգծեց դպրոցներում բժիշկներ ունենալու սովորությունը վերականգնելու անհրաժեշտությունը։

2010 թ. ՅՈՒՆԻՍԵՖ-ի հայաստանյան գրասենյակն աջակցել է դեռահասների ոլորտում 2 ուսումնասիրությունների իրականացմանը, որոնք բացահայտել են մի շարք խնդիրներ այս ոլորտում։ «Դրանից հետեւություն արեցինք, որ մենք կարիք ունենք ավելի գործնական քայլերի», – ասաց առողջապահության նախարարը։

Ըստ ՅՈՒՆԻՍԵՖ-ի հայաստանյան գրասենյակի ներկայացուցիչ Լեյլի Մոշիրիի՝ դեռահասությունը հնարավորությունների շրջան է,սակայն նաեւ՝ ռիսկերի։ «Այն տալիս է հնարավորություն ստեղծելու հիմք հետագայում առողջ ու արդյունավետ չափահասության համար եւ նվազեցնում է գալիք տարիներին խնդիրների առաջացման հավանականությունը։ Միեւնույն ժամանակ այս տարիքում սխալ ապրելակերպը կհանգեցնի հետագայում տարբեր հիվանդությունների առաջացման»,– ասաց նա՝ հավելելով, որ պետք է հաշվի առնել դեռահասների ոչ միայն ֆիզիկական առողջությունը, այլեւ նրանց անձնական, սոցիալական, զգայական ու մտավոր զարգացումը։

Հարցեր, պատասխաններ, մեկնաբանություններ